يوميات خريج
مواقف أمنية 16
زي ما إتعودنا مع بعض إن الصفحة دي مفتوحة لكل حاجة واي حاجة
بس المهم تكون حصلت فعلا
نيجي للحصل بقا
يوم السبت 21-1-2012 مدخل هرم سقارة
وكالعادة اللي مش محترمة علي اول بوابة العبور الامنية بيطلع علي كل بطاقات المصريين وحتي رخصة العربية
ويقول الكلام السخيفة أصحاب ؟
فنرد عليه:ايوة أصحاب
وكالعادة ميطلعش علي هوية الاجنبية او الاجنبي اللي معايا
الموقف ده إتكرر لحد دلوقتي ال3 مرات اللي رحت فيهم هرم سقارة
وفي كل مرة من التلاتة بابقي متغاظ إنه بيسألني ويسجل بياناتي الشخصية او بيانات صديقي صاحب العربية ومبيفكرش يطلع علي هواية صاحبنا او صاحبتنا الاجنبية
نيجي للموقف التاني
روحت معرض القاهرة الدولي للكتاب زي باقي الناس يوم 24-1-2012
واتمشيت عادي ودخلت صالات كله تمام
جيت دخلت جناح "الأهرام" في المعرض وهو علي ما افتكر بجوار صالة "4"
المهم وكان معايا صديقة أجنبية وباين إنها اوربية برغم إني كنت شديد الحرص علي إنها تبقي لابسة ملابس مصرية - أقصد طريقة اللبس طبعا- وكان معاها شنطة يد من النوعية الضخمة اللي بتكون اكبر من حجم البنت اللي شايلاها 3 مرات
المهم دخلنا جناح الاهرام عشان ندور علي كتب تعليم العربية المصرية
وملاقينش برغم فخامة الجناح إلي حد ما
جينا نخرج من باب الخروج
ها عدت عادي وموظف الامن متكلمش معاها برغم ضخامة الشنطة اللي معاها
جيت اعدي أنا وانا معايا شنطة ظهر خفيفة"Back bag" لاقيته بيقوللي الشنطة يا كابتن !!
روحت باصصله بعصبية وقلت له بصوت عالي
"يعني انت متفتش الاجنبية وعايز تفتشني"
ورحت ماشي وسايبه يعض في الارض.....
بصراحة كنت متنرفز جدا
حتي التعليمات الامنية بيتم اعفاء بعض الشخصيات منها, غير كدة حسيت إن اللي حصل فيه شيء كبير من عدم الاحترام ....
نيجي للموقف التالت
كنت داخل أحمد بن طولون يوم 28-1-2012
وكان معايا صديق مصري وصديقة اجنبية الاجنبية عدت من غير اي سؤال وانا وصديقي المصري تنح الامن اللي علي مدخل المسجد من الداخل عايز يطلع علي البطاقات الشخصية فمسبتوش غير لما شفت بطاقته وكارنيه الشرطة برغم إنه لابس اللبس العسكري بس هي بقا رخامة برخامة طالما محترمنيش واحترم الاجنبية عن اخوه المصري
وكان نص الحوار كالتالي:
امين الشرطة:بطاقاتك يا كابتن!
صديقي المصري:طلع البطاقة من غير كلام..
انا:كارنيهك..!!
أمين الشرطة:نعم...باقوللك بطاقتك!!
أنا:من حقي أطلع علي كارنيهك او بطاقتك لو عايز تشوف بطاقتى!!
وروحت مطلع البطاقة بتاعتي وخليتها في ايدي لحد ما لقيته قام من علي الكرسي وطلع محفظة كبيرة اوي
وقعد يفتش فيها عن بطاقته وكارنيه الشرطة
وإطلعنا علي بطاقات بعض
فسألتني صديقتي الاجنية: فيه ايه؟
قولتلها :علي نص الحوار اللي حصل, وزودت إنه برغم حدوث الثورة الا ان العقيدة الشرطة في مصر هي هي للاسف!!
بسم الله
ردحذفرائع جدا اسم المدونه وما انشأتها من اجله
ما اروع من يهتم بالعلم في زمن انتشر فيه الجهل والتخلف وغلب الهوى على العقل ما اروع ذلك استمر الى اللامام اتنمى ان تكون على كتاب الله وسنته نبيه محمد عليه افضل الصلاة واتم اتسليم حتى يكتمل الجمال والنور
والله ولي التوفيق